فيتامين دي و مشاكل نقص هذا الفيتامين موضوع متناول و محل نقاش و جدل
طبعا اني حاليا عندي بعض المشاكل النفسية وية هذا الفيتامين ... المشاكل هذه بدت من شهر تقريبا
سبب المشاكل هوة البحث الي مع الاسف اني و كروبي قررنا نكتب عنه
تعرفون شنو يعني انك تختار كتابت بحث عن شئ تحبه و بعدين كثر ما تكتب عنه يصير عندك اكتفاء و اشباع من كلمة فيتامين دي .. لدرجة انو اني كمت ما اخذ حبوب الفيتامين الي دافعة بيها 70 كرون ... يعني هسة اني من ورة البحث ذبيت 70 كرون بالزبالة
طبعا احنة كتبنة عن فوائده و هالخرابيط ... لكن البحث فكرته جانت عن اضافة الفيتامين دي الى الحليب بالدنمارك
و كروبنا المصون قرر يكتشف بكل قدراته الجبارة .. هل قرار اضافة الفيتامين دي للحليب القليل الدسم كافي لتخليص الدنماركيين من مشكلة نقص الفيتامين دي ؟؟
طبعا ماكو بحوث او تجارب دنماركية تجاوب على هالسؤال ... فالكروب مالتنا كام يفرفر بكل المواقع الغير دنماركية ... مخلينة دولة اوربية ما فرفرنا بيها و لكينة ان جارتنا الشقيقة و العزيزة السويد مسوية بحووووووووث من زمااااااااااان و اصلا اجباري اضافة الفيتامين دي بيها
و هنا جانت الصدمة الخارقة بالنسبة الي .. يعني اني من جنت اروح يم عمتي و بيبتي و اشرب حليب .. هذا الحليب جان مضاف له فيتامين دي ؟؟ سبحان الله ... زين بلكت اني ما اريد هذا الفيتامين و عايشة بالسويد ؟؟؟ ما يعجبني عندي مشاكل وياه ؟؟ شلون شسوي ؟؟ اروح للدنمارك حتى اشرب حليب مابيه هالفيكة ؟؟ ترة السويدين كولش مستعبدين شعبهم و ديغصبوه على انه يكون صحي ... مع الاسف هية هاي الديمقراطية؟؟ وين الي بالعراق حاسدينة على اوربا خل يجون يشوفون السويد شدسوي بشعبها
المهم اني شعلية ... الاهم بالموضوع اننا كعدنا نبحث و نسوي و نروح و نجي و نقرة تقارير بالسويدي و الفلندي و الانكليزي علمود نفتهم حكومتنة المصونة شكو وافقت على هالقرار
و اكتشفنا ان اضافة الفيتامين دي للحليب كبداية خوش فكرة طكاكية ... بس اذا بس حطينة الدي فيتامين بالحليب فحيبقة اكو نقص بالدي فيتامين عند الدنماركين لان التجارب يكولك اثبتت ان مو كل الناس تشرب الحليب و اصلا اصلا الدي فيتامين يحتاج الى دهن حتى يتحلل و يمتصه الجسم ... و همة خاليه وية الحليب القليل الدسم ... فلازم الي يشرب الحليب ياكل وياه شئ بيه دهن .. و يا جماعة الخير انتبهو الى النقطة الجاية
يكولك امريكا ضايفة الفيتامين دي اصلا بهواية شغلات حتى بالعصير و مع هذا الشعب الامريكي عنده مشكلة بنقص فيتامين دي
زين شنو الحل ؟؟
اني اكوللكم ... الحل ان الحكومة تعفي حبوب الفيتامين من الضرائب و كل هالحركات ... و تنطي جائزة لكل فرد يجي يجيك عدهم و ما يطلع عنده نقص ... و يا ريت الجائزة تكون عبارة عن سفرة لشخصين لاي مكان مشمس بالعالم ... بس الكروب ما عجبه الحل مالتي و كال هذا حل مال ناس تريد تتمصلح براس الحكومة ... ما ادري اذا همة قصدهم جيف اني عربية و احب اتمصلح ؟؟ بس ترة ما بيها شئ الواحد يدور على مصلحته و اني مصلحتي حاليا بان ما اشرب الفيتامين دي مدام مخاش ابجيبي شئ من اشربه غير الصحة و هالتفاهات... بس خل يسوون جوائز والله انسى اتغدة و لا انسة اخذ حباية الفيتامين دي
و اخيرا و ليس اخرا .. سلمنة البحث اليوم و اكثر فقرة عجبتني .. من حطينة اسمائنا و وقعنة ... حسيت نفسي فد شئ خنفشاري و مسوية بحث مفيد للبشرية و حيساعد حكومتنا الموقرة باتخاذ قرارات دكتاتورية اتجاه شعبها .. كالزاميت اضافة الفيتامين دي في الحليب و الخبز و حتى باللفات الي نسويها لجهالنا .. نرش عليها فيتامين دي بدل الملح ... اني متشوقة لرؤية الجيل القادم الي حياكل اكل كله فيتامينات و يكون جيل قوي ماعنده اي امراض و ما يكلفنا مصاريف الدكاترة
يالله تصبحون على خير و الله يكثر من فيتاميناتكم
ملاحظة : الي يريد نسخة من البحث من عيني بس النسخة ب 25 كرون .. بحث متعوب عليه ترة
ساندي 11/06/2011
ليست هناك تعليقات:
إرسال تعليق